尋覓... 任 婉儀

雪宮仙館

白雪仙懷舊說  

新萬言專訪 1990年                                       下一篇

記者 ： 任姐逝世一個多月，妳心情好番未？

仙姐 ： 坦白講，呢半年我都唔知日子點過，好似同個世界脫晒節一樣，成個人空蕩蕩咁，好在有個基金會度做下，總算精神上有寄托。 我多怕薛覺先啦！我諗呢有冇創意、有冇魄力係與生俱來，不可以勉強，有時亦要講纒天份問題，所謂三年出一個狀元，十年唔一定出一個好角。

記者： 傳言係因為任姐去加拿大，當地天氣寒冷才發病，否則可能唔會死。

仙姐 ：同去加拿大冇乜關係，我地七月去加拿大，當時天氣好和暖，後來先發現話係肺癌，初初重呃我話係慢性老人家癌，可能冇咁快擴散，可多活五、六年閒閒地，後來先至知道，原來佢係最惡劣一種，好快就擴散。不過佢十一月初出院時，完全冇乜事，重可以打牌，真係想唔到，我最初冇辦法接受呢件事，咁多年來，有關任姐起居飲食，我都細心調劑得宜，一群醫生圍住佢，任姐有少少血壓高，一直有藥食住，有醫生照顧，癌冇得講，唔通識得多醫生就唔駛死咩！任姐七十七歲去世，人地話佢高壽，不過，以而家醫學咁昌明，呢個年紀並不算高壽。

記者： 仙姐，你與任姐性格，其實都好有距離。

仙姐 ：可以話我地係南轅北轍，除愛朋友之外，我地好多唔相似，任姐係比較傳統思想人，好似過年過節，徒弟拜年拜壽，跪地斟茶，佢就坐到四平八穩飲徒弟杯茶，而我永遠覺得難為情，每次佢地一跪低，茶照飲，不過即刻企起身。佢好怕凍，我又好怕熱。講到演戲，我地方式都唔同，孫養農先生講起任姐，話佢做乜都錯，卻勝在錯而好，錯而靚，我係緊張大師，任姐係隨意派，今日鍾意咁唱，明日又鍾意另外一種唱法，今晚鍾意咁做手，明日又完全唔同晒，所以學佢的人相當困難，但無論佢點樣做，點樣隨意，始終揮洒自如，睇得觀眾如痴如醉，唯一可以解釋鮋係：「華光師傅欠佢錢，今世還番畀佢。」

記者 ： 重有冇其他差異之處？

仙姐 ： 大家處事態度唔同，任姐隨和，我有原則，佢影親相都笑咪咪，重成日話我影相唔笑。我同佢對金錢觀念亦唔同，我對錢從來唔擔心，就算係李後主好唔掂時，我個手袋只有五十蚊，我都可以帶住班徒弟去學，點解我唔驚？因為我諗自己冇錢可以捱窮；而任姐對金錢較重視，可能因為佢嘗過貧窮的滋味。當年任姐去美國登台，都係為賺錢贖番我層樓，人地請佢，又請我，成二千美金一日，我有原則，話唔做就唔做，因為去美國登台，以前冇話成個班底帶去，最多帶一兩個音樂師傅，其餘就美國拉雜成軍。好多人以為任姐唱完一台，又會同我做一台，我寧願後台幫手，都唔願上台賺筆錢。事實上以前美國唐人觀眾根本就唔重視，反而新香舊臭，梅香都可以做花旦，吸引貪新鮮觀眾。

記者 ： 一般外界對任姐評價係好好人，仙姐你就好惡死，會唔會係你地兩 個性格距離大，任姐做晒好人，你做晒醜人，先至畀人咁印象？

仙姐 ： 我唔理人地對我點睇，我都冇必要解釋，亳無疑問，任姐非常之好人， 佢份人最與世無爭，肯吃虧，所以佢人緣咁好，以前波叔改佢一個花名，叫佢做「精生」。

記者 ： 精生， 乜意思？

仙姐 ： 做人走精便囉，任姐肯吃虧，唔會同人地過唔去囉，而我性格唔同，我一向有自己原則，好似在醫院時，有個醫生同我講，勸我圓滑，我同佢講冇咁必要，如果係朋友，有進一步了解，根本就明白你性格係點，向人解釋係多餘，我絕對唔會為遷就人去改變自己做人原則，我生存在呢個世界上唔係要討好任何人，如果為人地歡喜而改變自己，咁咪好似畀人牽住我走。可能係年紀大關係，我而家都同意，做人，多個朋友好過多一個敵人，楚原亦曾經話過我，話我得饒人處不饒人，以前年輕時，我或者真係咁。我承認，我以前脾氣係好直，一唔開心，喜怒形於色，如果我同任姐唔開心，我唔理係唔係擺緊一百圍酒，我一唔鍾意，就會黑口黑面，不過演戲時就唔會，如果我與任姐唔開心，面對觀眾時我亦唔會嬲。因為呢係演員應有責任感，亦都係因為我代入個角色，唔可以因個人情緒影響我演出，對唔住觀眾。而我一生最安慰，就係搵到自己最鍾意職業，愛上自己戲中的角色。

任婉儀 Blog Posting